My 16 random things

Blog 有blog tag, 唔到facebook都有tag. 幾得意所以接咗,post埋係度啦．

Rules: Once you’ve been tagged, you are supposed to write a note with 16 random things, facts, habits or goals about you. At the end choose 16 people to be tagged. You have to tag the person who tagged you. If I tagged you, its because I want to know more about you.

１．新年仲有幾日，呢幾日要點準備好呢?
２．新年假期１０日，會留港消費，要諗下點用．
３．每一日都好忙，目的，只係希望放假時玩得開心．心中無憾．
４．經常拋低家人朋友專心工作，目的，係可以陪家人時可以無負擔咁享受．遊閒．但，究竟係咪用錯方法？
５．享受現在0既生活．可以幫人，可以幫自己．
６．鍾意食甜食，但更怕有痰，所以少食．
７．我算唔算外冷內熱? 唔算．應該係外熱內熱．所以經常感冒發燒．
８．一個典型買物狂．花費太多係無謂物品上．
９．山羊座，迪斯馬斯古．係一個好兇狠但只識做o野唔識諗0野0既人．只係想係個簡簡單單0既工作環境做事．
１０．被人撩起左條癮新年出潛，最後都係放棄左，只係以儲錢為大前題．
１１．好想同至愛係共同興趣，共同活動．一齊享受生活，咁已經足夠．
１２．朋友唔多因為經常鬧人．但因為當佢朋友，自己睇唔過眼先出口，唔係，尤得佢啦，
１３．自己係一個好極端0既人，一係好專心，一係好容易分心，所以有時做事係好慢，因為multi-task得太緊要．
１４．想去唔同地方生活，生活係唔同世界一段時間．
１５．做任何事只想憑良心去做，開開心心．情願將ｄ麻煩事自己攬上身，等其他人開心ｄ．
１６．過年後，要繼續為人生大事繼續準備．全速前進．

短袖背心

短袖背心

係喎, 你過o黎要揾吓有無底衫著. 睇吓係仲有無短袖背心先.

? 短袖背心? 我有短袖背心咩?

係呀, 上次過來時都睇過, 好似無短袖背心.

但係, 你講短袖衫 定係 背心呀? 短袖衫會係背心... ?

唔係喎... 上次.... ? 你, 唔准笑呀. 剪短咗隻袖0既底衫....

係, 係, 咁好似唔叫背心啫...

唔准再講呀...

(二人傻笑中.... )

Blogged with the Flock Browser

SPCA 灣仔海濱長廊狗狗白色聖誕

又一次同spca出function,今次比上次好得多, 係灣仔到攪, 果然比淺水灣好得多,  雖然大家都係雨中扭波(結果係淋病咗,第二日放假，本來係消假，結果係變咗病假, 不過都係放假嘞, 哈哈哈), 但係同平時相比, 無咩問題啦.

今次活動, 好多謝今次兩位統籌, 唔單只有靚靚支援人員同場支援外, 仲同大會好快咁爭取咗個好地方連帳篷等我地可以避雨, 若遲d先問, 可能已經被其他人用咗.

見到好多愛狗人仕靚仔靚女帶住狗狗(貓都有架)散步, 同佢地扮靚, 扮得又型仔,仲好有聖誕氣氛, 真係好鬼開心, 更加感受到佢好對動物既愛心. 雖然活動前小小波節, 另到大家事前準備好既價目表無出現到, 但可以話因禍得福, 因為咁, 我地更加可以無拘束咁即場創作, 更加知道就係, 主人為咗佢地0既仔女(狗狗), 會變得創意無限! 唔係都唔會出現"動物小皇冠"呢~~ 真係要多謝佢地帶來新0既靈感比我地, 亦因咁樣, 其他主人有樣學樣, 好有興趣咁落order.  當然捐款亦都增加咗啦. 多謝自己0既勞力之餘, 更加多謝佢地既創意.


呢隻大狗，真係好巨型，一出場就引黎不少閃光燈．去到邊個攤位，都有一大班人圍住黎影相．自己都影咗張．坐低咗個壓力真係細ｄ．



呢個皇冠我扭架，佢真係好乖，戴完皇冠之後仲比我地抱住影相．

Blogged with the Flock Browser

０８回望／０９展望

新年快樂！！！　



２００８終於成為歷史, 今年, 都想襯呢個機會回顧一下０８年既大事. 自己心目中o既大事．

一月, 向日葵被風雪所困，困於火車十幾小時，幾經波節先返都老家．担心不已，幸好一切平安．
二月, 過農曆年．平安過渡.
三月, 開始工作過勞.
四月, 以過勞情況下, 增加咗義工活動. 從中減壓不少.
五月, ５１２,唔可以忘記既日子. ５１２大地震. 事發當日自己仲為緬甸風災籌款, 估唔到,一星期後, 要為自己袓國籌集,出一分力.
六月, 飛咗去歐洲一個星期. round trip. 見識多咗. 但攰到死咗. 但仍然係不枉此行. 辛苦都係值得0既.
七月, 終於開始落水, 感覺真係好. 可惜貴咗d. 要慳d駛, balance返條數. 亦為自己私務作出安排.
八月, 為攪私務而返咗湖北一趟, 心情緊張, 但好好開心；撞正奧運, 世界盛事. 更加係中國人0既大大事. 係國內，大街小巷全國人民對呢件盛事0既熱心同鼓舞, 全世界都感受得到, 國力0既表現, 為中國人吐一口氣!! 唯一遺憾係劉翔0既受傷...
九月, 工作最低潮, 最忙最勞碌既一個月．．　；不少舊人離開，心理壓力比實際壓力更加大．
十月, 由九月尾到十用初放了一個星期假外潛去. relax. 叉電．正！！ 唔理點講，玩咗先講，返來後先重投地獄最深處.
十一月, 忙於私務,義工,工作,多翻波節. 未停過手.
十二月, 唯一好消息係向日葵可以陪我過聖誕. 普天同慶呀!
    不過聖誕假一連四日三夜都咁忙, 穿梭於各個不同場合. 辛苦咗佢咯.

２００８是忙碌的一年，相比前幾年既生活，今年變化都好大（年年件咁講），感覺上好似由一隻牛，變咗兩隻牛咁，尤其是正式加入咗義工隊o既行列（真係一個 好黑暗o既社團，會上癮o既），犧牲咗好多私人時間，連陪家人/女友時間都因為咁減少咗，但係認識咗一班志同道合o既新朋友，同埋眼光都擴濶咗，最明顯係個 人開心咗，所以自己都覺得係值得o既．

好多謝雪晴介紹咗呢班咁攪鬼o既朋友比我，自己好似開多咗個新地盤咁．

另一個要多謝o既係Carson，因為認識到呢個人，所以加咗Ｃ＆Ｆ呢個團體（簡直係黑暗社團），四出服務之餘又可以同一班志同道合o既朋友嘻嘻哈哈，真係”助人自樂”．

其實更加要多謝女友，佢唔單只無因為我參加咗活動減少咗私人時間而唔開心，反而更加一齊出席活動支持我．多謝妳．

身體，其實比去年差咗少少，氣管問題ｓｏ　ｆａｒ　ｕｎｄｅｒｃｏｎｔｒｏｌ，但係感冒之類小病痛多咗，反而察覺到一件事，係旅行出發前就算係帶病出發，但到步一兩日就會ｒｅｃｏｖｅｒ好返．直到回港為止，外潛／湖北都係咁．直係休息夠就身體健康，今年會好好注意呢點．

今年，應該會比去年更忙碌，但今次係忙自己事咯．自己將要踏入人生另一個階段，要好好籌備自己o既人生大事．好好分配自己o既時間首要目標．寄望今年事事順利啦．

好嘞，寫住咁多先．有機會再落筆．

煩都講多句．大家新年快樂．２００９一切事事順利．各方面比０８更好！

Blogged with the Flock Browser